維園年宵是歲晚必去，趁住還可以在花市盡情搶購本地年花，（就快無啦，連任在望的梁凸硬發展，趕絕農地年青人才上到樓，才搵到建築和設計的工，十年後只有禮賓府後花園那個茂利才有資格調理農務插蘭花！）還買到生鬼頂癮的賀年小品。
今年除了搶手的狼屎忽煙灰缸（台灣友人點名想要的伴手禮），還有提醒香港人記住renew BNO的攬枕。年輕人擲錢原創，在維園年宵盡情發聲，唔驚坐洗頭艇就假！香港地，平安與自由，並非唾手可得的，連黎局長都只能從羊年一直等，等埋猴年，廣東公安廳睬佢都傻！整幾件諷刺時弊而大受歡迎的年宵產品，楊局長真係未見過，年輕人不是喬布斯，隨時被毒舌BB舉報、狂插，足以令你就算採用什麼方式都返唔到大陸，咁點見工呢？試問，邊位大老闆會聘請呢？一句到尾，後生仔搵食、搵工、搵樓就對路了，搞咁多嘢？浪費警力！噢不，浪費老母供書教學！哎，退學啦，聽做小販，被食環一日拉七次啦！
上帝要你瘋狂，內地教會被拆晒十字架，迷信天堂留位的人，到支聯會檔口買幾本禁書看看吧，說不定馬騮執到桔，悟出挽救中港末日的契機。猴擒How come？睇睇……阿門。