一年一度嘅年宵今日開幕嘞！專門自家炮製諷刺時弊年宵產品嘅民主黨，今年再獻新猷，整咗盒「超然鬥獸棋」，隻隻棋大大粒好揸手，主角有CY狼、夢熊、獅吼元秋、猿國強、驢寵物、熱狗、鼠王芬、蟻民，隻隻珍禽異獸均可食蟻民，蟻民只可食CY狼，一食就無敵，之後食乜都得。
入鉛水河延年益壽
原裝鬥獸棋有條小河，但民主黨將小河變「鉛水」，只有蟻民可以入河確保延年益壽；獅吼元秋因為老公係中國建築非執董，所以可以跳河到對面岸，無規無矩。有份設計呢副鬥獸棋嘅民主黨創意媒體部部長黎敬瑋話，限量500副，每副88蚊，維園18號攤位今日起供蟻民搶購，等大家返屋企諗計點樣食咗CY狼。
該黨年年免費贈送摺紙模型畀市民過手癮，今年就送「足金金猴」，附送一系列小型揮春。