郭富城一上舞台就發光發亮，估唔到天王變猴王，喺3D賀歲片《西遊記之孫悟空三打白骨精》扮演孫悟空，一樣活靈活現，套戲嚟緊星期六就有得睇。
全身密封汗叠汗
城城孭飛扮孫悟空嘅《三打白骨精》，由星皓聯同多間電影公司共斥資4.5億港元開拍，台前幕後班底都係精英，城城造型由拍過《戰狼300》嘅特效化妝總監Shaun Smith打造，由頭到腳嘅每撮金毛同頭上金剛箍都係手做。城城每日就着上倒模嘅膠衫，身上再慢慢黐毛，再配特技化妝，令個馬騮樣入型入格，變身過程花上7粒鐘。城城每次變身後就過非人生活，因為造型全密封，又唔可以去廁所同食嘢，打到出汗都要焗住，每日一拍起碼10個鐘，城城大呻話化妝搞到臉上出水泡。
城城有多年舞蹈底子，動作夠敏捷；多年拍戲經驗又練到凌厲眼神，城城日前用普通話接受訪問時話：「非常大的挑戰，雖然辛苦但很爽，最震撼也最難忘。」城城好多武打動作都親力親為，唔使埋位時，都會揮金剛棒務求人棒合一，城城話：「從來沒在電影裏看過自己打那麼多。」
撰文：馮仁昭