有傳山珍海味有補身作用，但其實未必人人啱食，例如鮑魚屬難消化食物，有消化不良的人士不宜多吃；而冬菇更是痛風病人的大忌，究竟海味的補身成效有幾高？長者又是否要敬而遠之？營養師分析花膠、海參、鮑魚、冬菇及瑤柱的營養價值，想食得健康同食得放心，即睇！
VNS營養健康中心首席註冊營養師詹兆洲就指，不少人單從膽固醇及蛋白質來衡量海味的營養價值，其實海味中亦含豐富微量元素，例如鋅、鐵等，對健康有利，尤以花膠及海參含最高營養價值，兩者都僅含少量膽固醇及近乎沒有脂肪，「花膠含豐富膠原蛋白同埋鋅，對於女士美顏、改善婦科問題都有好處，而鋅亦有利男士製造精子。」但詹兆洲提醒，如正哺母乳的媽媽則要留意，因為進食花膠會影響母乳濃度。
另浸發需時的海參原來亦屬健康海產，其蛋白質很高，且含豐富鐵質，具補血效果，亦有利長者製造軟骨素，而且海參不難消化，只要烹調時不用高鹽高油方化，絕對適合一家大細進補。
提起難消化問題，就一定要留意鮑魚，詹兆洲指出：「只要切薄、切細粒，仍然係有營養嘅食材。」他解釋，因為鮑魚同屬蛋白質豐富的海產，含omega3脂肪酸，但脂肪不高，「相對其他海味，鮑魚係有較高膽固醇，但其實都係含量低，只要唔同多油份食材一齊食，影響不大。」但他提醒，進食前一定要去除腸臟，「有好多污染物。」同時指，乾鮑、鮮鮑及罐頭鮑的營養價值相等，所以不用執著買價錢昂貴的乾鮑。
至於痛風症病人最忌的菇類，詹兆洲提醒痛風症、結石病人不應吃太多，但唔使完全禁食，「一至兩隻已經足夠。」因為冬菇有水溶纖維，有平穩血糖和膽固醇的作用。反而最普遍的瑤柱，他就建議少食為妙，「鹽份高之餘，又唔算有好高營養價值，只係含有限筋腱類蛋白質，加上柱芯容易積存重金屬。」而且難消化，建議高血壓、水腫、痛風症病人，要避免食太多。