香港「call的apps大戰」暫時偃旗息鼓，不過中國仍然戰火四起，雖然分別由騰訊（700）及阿里巴巴集團有份投資的滴滴及快的去年合併，不過「過江龍」Uber進軍中國，兩間公司仍然鬥得難分難解。本來以為馬雲會力撐中國企業，點知佢食晒兩家茶禮，螞蟻金服公佈同Uber合作，就算在海外用Uber，用支付寶就可以過數，仲話港澳台Uber最快喺新年前啟用。
雖然滴滴快的喺中國仍然有好多人用，不過Uber喺海外地區的領導地位都幾難動搖，而Uber早喺2014年就可以用支付寶交錢，今次更加率先同Uber喺海外合作，雖然明眼人都知，螞蟻金服係想中國人出門旅行，都繼續用到支付寶畀錢過數。之不過一直都想擴展海外業務的滴滴快的，見到馬雲竟然咁幫對家手，唔知佢哋又會點諗呢？