湖人嘅當家球星拜恩（Kobe Bryant），雖然喺周日迎戰黃蜂嘅常規賽傷癒復出，但佢都難阻球隊以82:101輸波；湖人今場除咗慘吞10連敗之餘，仲追平咗球隊喺1993/94球季所創下嘅連敗紀錄。
37歲嘅拜恩今場拎到23分，但眼見愛隊9勝41負嘅劣績，呢位會喺今季退役嘅球星都有啲洩氣咁話：「老實講，呢支球隊喺今季嘅表現，已經差到冇得再差，我只係想用盡一切辦法，幫球隊贏波。」
祖蒙特格連大三元炒「紐」
紫金兵團一直都係聯盟中嘅豪門勁旅，真係好少有落魄嘅時候；喺湖人嘅隊史中，除咗今個球季之外，只係喺22年前出現過一次10連敗。難怪《ESPN》爆料，話湖人計劃喺未來兩季，先後引入會變成自由身嘅雷霆孖寶杜蘭特（Kevin Durant）同韋斯卜克（Russell Westbrook），希望可以重建紫金王朝。
湖人嘅戰績唔多理想，但同樣坐落於加州嘅勇士就越戰越勇；佢哋喺同日以116:95擊敗紐約人，豪取七連勝。而今場拎到「大三元」20分10助攻10籃板嘅祖蒙特格連（Draymond Green），更加追平咗名人堂成員高拿（Tom Gola）喺隊史單季拎到九次「大三元」嘅紀錄。