立法會一眾男議員中，身形最fit兼最姿整嗰幾個，一定包括自由黨主席鍾國斌Felix，佢身為紡織及製衣界議員，當然深明身形先係最好嘅品牌啦，所以現年52歲嘅佢無論公務幾忙，都會抽時間游水，以便保持fit爆身形，呢幾年佢仲參加過渡海泳，喺鏡頭前展示美好身形！原來佢呢種水性，細細個已經培養，但當時只係為咗強身健體，唔係為咗體態美。
咪睇Felix家陣大大隻，佢自爆細路哥時好鬼奀，從佢向八方提供，6歲時候去雍雅山房影嘅相中可見，佢當時確實係瘦仔喎！佢話好記得當時係被老竇捉住去學游水，話想佢強身健體；最終經過10年苦練，奀豬真係變成大隻仔。佢提供嘅一張練水「肉照」證明，16歲嘅佢已經有fit爆嘅body。
盧偉聰係泳會隊友
Felix話呀，之前仲撞番當年「海天泳會」嘅隊友，呢個隊友原來係警隊一哥盧偉聰！Felix仲笑言，係對方認到佢先㗎喎（咦，係咪想暗示自己keep得好，所以對方一眼就認到佢呢？），到底當年邊個游得快啲？Felix自豪咁話：「睇我𠵱家身形，都估到啩！」