人仔細細志氣大，正好形容剛滿13歲嘅香港花滑代表梁懿（Christy），上周五喺新疆全國冬運會越級挑戰下，歷史性奪得女子花樣滑冰成年組自由滑銅牌，噚日同媽咪帶住獎牌見傳媒嗰陣，一直笑唔停。七歲喺太古城學花滑嘅佢，喺九歲嗰陣為咗有個標準場練習，舉家移居北京，半年前請全國冠軍李成江做私人教練，一年學費超過20萬港元。透過網上遙距課程讀書嘅Christy，最大心願想參加2022年北京冬奧。