呢幾日真係要唱番句「冷得我騰騰震呀」，市區氣溫得幾度，對於長年累月呻話樓市寒冬嘅地產代理嚟講，更加名副其實係雪上加霜。事關天氣凍成咁，好多之前實牙實齒話會睇樓嘅準買家甩晒底，搞到代理開唔到單，份糧真係凍過水。
過去兩日，有大型地產商開售新盤，一大班地產代理就算凍到腳震震都要去售樓處，盡最後努力撈客，現場見佢哋全部着晒羽絨、風褸，成隻糭咁喺商場派傳單。
中原亞太區住宅部總裁陳永傑都話，做代理其實好似零售業，逢親紅雨、黑雨、又或者凍到好似噚日得幾度，呢一類極端天氣，都會唔見三至四成準買家睇樓。美聯住宅部行政總裁布少明直情形容，今個月樓市好似天氣一樣「極度冰封」。