這天爆開有條路，冷win出現無分班次、路程同騎練，總之就係爆到七彩。
第六場二班草地1800米，只得10駒角逐，但賽果卻驚人，頭馬仲冷過第三場74倍win郭能賢廐座騎「新界福星」，今場主角係122倍的葉廐馬「聰敏不凡」，增程初跑1800米兼首配吳嘉晉，結果前置跑均速一放而回，跨季五仗落第後反底贏馬，情況似足「新界福星」，唔同嘅係「聰明不凡」今場122倍勝出，成為季內暫時最冷頭馬，組合獨贏A3派48.5元。賽後其他騎師如韋達、柏寶等，見到咁冷嘅賽果，都笑咗出來。而原來今季第二冷頭馬，亦由吳嘉晉經手，乃11月29日其士盃贏79倍告東尼的「萬事勇」。
「聰敏不凡」練馬師葉楚航連同第二場贏「拖板王」在內，這天跑完上半場已經起冷孖，至於身為佢前徒弟的吳嘉晉停賽復出跑到第三日，亦告打開2016年勝門。
呢場再次係冷門行頭，殺晒兩大熱門，事關二、三名正正順序係最熱的韋達座騎「凱旋生輝」及次熱雷神座騎「期惑」，第四名是由柏寶操刀的「聰明才智」，四重彩派近5.7萬元。