東方向來鍾意搞新意思，噚日除咗擺檔幫球迷「畫花面」同安排天使打氣，仲搵咗東方小丑出場，仲將東方「更衣室」搬咗去球迷區（圖），畀球迷影相留念，齊齊做第12人！
花絮︰南區打蛇餅
第一次入銀牌決賽嘅冠忠南區，亦花唔少心思推廣，大派月曆同打氣棒（圖），球迷玩遊戲仲可以獲贈打氣毛巾等禮物；現場所見，條玩遊戲人龍打晒蛇餅，就知道反應相當唔錯啦。
花絮︰球迷有層次
撐本地波嘅，又何止本地球迷？噚日場銀牌決賽，有4,557名球迷冒住超低溫入場，當中有唔少外籍人士；其中一位來港九年嘅丹麥球迷（左），就帶埋六歲囝囝入場，佢話邊隊贏波冇所謂，最緊要兩隊踢場好波就夠啦。