港股上周五於無特別「新鮮」利好消息下「大反彈」，最多曾升逾610點，收報19080點，較周四升538點。在券商「掛單」的自營部（跟券商合資炒賣股票）朋友跟密西比呻，由於早前決定將主要精力放在恒指「夜場」，所以周五「唔係執到咁多」，浪費了突如其來的升市。
朋友說：「原本覺得舊年（個市）好難玩，但今年雖則只係過咗3個禮拜，勢估唔到一山還有一山高，今年堅難玩……難玩嘅地方，唔係個市大上大落，而係個市好多時都係因為啲求證唔到嘅中國消息，被有心人反常咁舞高弄低！」
如何舞高弄低？朋友說：「內地經濟差，消費差就梗㗎啦，好自然要short消費股，但內地可以無定向風咁傳中央出手救行業，即刻被夾死……我明白政策嘢係毫無先兆，沽空都預咗有呢個風險，但令人氣結嘅係次次傳完都係無下文！簡直係㩒住搶！」
市場反常，自嘲是「舊電池」的朋友，惟有轉戰較「合乎邏輯」的恒指「夜場」。打算一直「喜愛夜蒲」？朋友說：「睇吓大話可以再呃多幾耐囉。」《狼來了》現代版？
密西比