耀才（1428）老闆葉茂林真係好識得製造話題，之前耀才成日以低佣金搶客，可能見近幾個月股市跌到一仆一碌，低佣都好難吸引散戶注意，佢就跟港交所（388）一齊換形象，不過就唔係改logo款式，而係換logo顏色，由以前棗紅色改為橙色。
為配合呢個改動，日前耀才舉行周年晚宴，就以橙色做主題，現場佈置係橙色，亦要求員工，包括股評人郭思治盡量着橙色衫，於是就出現呢個咁橙嘅場面嘞。聞說葉老闆覺得以前棗紅色感覺比較老餅，橙色好似年輕啲，sharp醒啲，希望吸納一班年輕客。
橙色的確係顏色鮮艷，夠晒搶眼，不過橙橙聲，好易讀咗慘呀慘呀，𠵱家股市跌得夠慘了吧。