上次日賽焦點係「雙莫」大戰，即係莫雅與莫雷拉對決，一星期後的這天再於沙田同場較技，雙莫由頭場直落輸到第九場冇贏過馬。去到第十場全日重頭戲總獎金達1,000萬的本地一級賽經典一哩賽，雷神同莫雅齊為蔡約翰馬房効力，分策全港首、次高分四歲馬「澳斯卡」同「首飾太陽」上陣，彼此都係新勝1400米而加程首戰1600米，惟賠率卻差天共地，「澳斯卡」2.4倍大熱，「首飾太陽」令人意外地為9.2倍半冷，反映各方對「首飾太陽」呢匹雷神棄騎都唔太睇好。
不過跑落卻係另一回事，排14檔的「首飾太陽」在莫雅胯下有前有後，最終力壓另一新勝馬「明月千里」率先衝線，頭馬獎金570萬。組合獨贏3揀1開A2派27.5元，勝出練馬師則開B1選項蔡約翰並派19.5元。
綽號太陽神之「首飾太陽」在港六戰五冠一亞全入Q，馬主董滿輝揚威大賽，而莫雅亦告首次勝出本地分級賽，至於蔡約翰更係從練首奪經典一哩賽。
相反「澳斯卡」今場大熱倒灶只得第五，出道以來第一次三甲不入，連帶這天出足11場的雷神直落連輸10場Win，粉絲們嗌晒救命！
摩廐打吡棋子「明月千里」上次初出即贏1600米，今場再攻此程續由布文執韁，後上追唔到走甩咗的「首飾太陽」屈居亞軍，今場三、四名分別為冷門「有得威」及熱門「幸運如意」，四重彩派一萬蚊鬆啲。