睇番喺過去20年，港滙每逢喺跌勢之中，出現單日急升走勢嘅話，就確認港滙回穩。近期大家驚人仔出事、驚資金流走，今勻港滙明顯係主角，佢回穩的話，反映最壞情況暫時過去，咁即係點？港股短線見底機會大增吧。呢個短期底，希望能夠頂住兩三個月內。揀股就以中資股為主，繼續講番鞍鋼（347）。年初到家陣，恒指大大話話跌咗12.9%，至於鞍鋼就升咗14.7%。鋼鐵行業死穴係經濟太差、鋼價太低、產能過剩，當中最致命係產能過剩，令到鋼鐵股長期成為A股最低殘嘅板塊之一。
中央之前用過唔少招數，首先係淘汰落後產能，但落後產能主要應付落後地區，想淘都冇得淘。之後，又試吓將鋼鐵出口，後來出口量直頭達到日本產量總和！雖然2015年中國鋼材消費量和粗鋼產量都出現20年來首次下滑，但今年1月上旬，重點鋼鐵企業粗鋼日產量按月升1.82%，而重點鋼鐵企業鋼材庫存錄得微降，情況開始見曙光。
仲唔夠，中央想大大力咁為鋼鐵業去產能，將每年出資1,000億元人仔，持續4至5年，支持煤炭、鋼鐵業去產能，用嚟安置員工。須知道鋼鐵企業難減產、難執笠，重點係照顧就業問題，今次中央出錢畀鋼鐵工人轉工，算係咁耐以嚟最對症下藥嘅做法，鞍鋼賣點下期再講。
晉佳
https://www.facebook.com/advanceguy1/