資產升跌影響連連相扣，睇新聞成日話貨幣貶值，市民最直接諗到，錢係咪越來越唔見使。晚晚大台教路點樣食平啲，加拿大民眾近日亦照樣學樣，要食得精明啲，因為油價勁跌下，加元兌美元持續貶值，大家都開始左度右度縮開支。
加元滙價過去一年貶值超過兩成，當地超市最能直接反映物價漲跌，生果同蔬菜售價接連升超過一成。4年前產量多到唔要嘅蕃茄，今年貴到每磅4.49加元，折合約25港元；袋裝西柚售價由6加元升見15加元，約80幾蚊港紙。
油價跌同加元貶值夾擊下，令加國民眾生活都發愁。追溯今次加元貶值源頭，作為原油出口國之一嘅加拿大，影響極大。加拿大西部原油價格月中曾創10年新低，報每桶19.82美元，加上當地原油開採成本高，令油商無利可圖。冬天係加國開採原油高峯期，於亞伯達省等石油開採地區，每年平均有530個鑽油台開工，但上年12月中只得約158個鑽油台動開工，勁跌七成。部份油企自上年縮減開支四成後，今年再削支最少兩成半，甚至有油企停產止蝕，最近有報道話中石化亦考慮關閉加拿大嘅分部。內地其他城市陸續浮現油價暴瀉及加元貶值後遺症。例如當地石油開採產業區亞伯達省失業率持續上升，越來越多民眾到食物銀行領取援助。
Captain Cool
本欄逢周一刊出