星期日（17日）不僅有沙田10場賽馬，還有渣馬香港馬拉松，天文台高調提醒當日有雨，而且雨勢有時頗大。馬會首席受薪董事祁禮謙和不少馬圈中人，那天會先戰渣馬，再趕入沙田馬場開工，真的無懼風雨。
濕凍天氣，無論對長跑或賽馬都是艱巨挑戰，其中雷神莫雷拉在第10場三班1400米，棄騎新勝馬「連利進寶」而揀摩廄「彩福」，後駒連續兩仗都以短距離屈居亞軍，今仗再配雷神，馬兒在港未跑過變化場地，但來港前在澳洲贏出的兩仗均屬軟地，一旦周日傾盆大雨，捧場客至少可以放心。
除了「彩福」有變化地根據外，別忘同場另一駒亦擅長打水戰，就是蘇偉賢馬房的「麯院風荷」，喺2014年5月愛爾蘭李奧柏馬場，角逐2000米三級賽打吡預賽錦標，以首名過終點，惟因直路內閃干擾對手，被貶落亞軍，當日係黏軟地，再之前則曾喺大爛地1600米表列賽跑獲季軍。
「麯院風荷」來港後未跑過變化地，嚟緊周日終於遇上！今仗「麯院風荷」抽14檔，若然偏快場地無疑是不利檔位，但角逐變化地的話就完全相反，早段場次內欄草地會被馬匹踩到爛溶溶，反而中外疊場地會較佳，走得更順。
「麯院風荷」亦係騎師貝諾華在港最後一戰，佢當然鬥志如虹，呢匹馬隨時為佢留下美好回憶。