電影《江湖喜劇》前晚在銅鑼灣舉行煞科宴，鵬哥講感受時即場爆粗贈興話：「唔知拍乜X，但係見到咁多演員就知實收。」伍詠薇在片中飾演江湖阿嫂，除了爆粗還要色誘校長譚詠麟，曾當影帝的校長大讚伍姑娘好索，還要給她捽大髀，問校長多年沒有拍戲有沒有信心再做影帝，他說：「唔好講呢啲，有過就算喇！一切隨緣喇！」
「開心先會記一世」
另外，伍姑娘早前在胡杏兒婚禮同陳山聰被指破冰合照，她解畫：「我想知係邊度寫嘅，有朋友話我聽，我有睇報道，唔係，嗰日杏兒結婚嗰件係喜事，熱鬧，勁過台慶，山聰呢個名真係多年冇提過，嬲唔嬲大家唔會知道，但係見到面都冇乜嘢，同埋當日好多人攬嚟攬去，楊怡帶佢過來say hello，我都好禮貌hug一hug，講happy new year，覺得打咗招呼好舒服，唔係咁多年大家講嘅咁，嗰啲都係你哋嘅揣測，所有嘢都在心中。」
伍姑娘指不是甚麼破冰：「咁大個人唔會好刻意，嗰一刻無可厚非係有件事發生咗，係咪真係要唱出來，鬧晒交，你唔好睇我係咁嘅人，其實我個人係幾大丈夫，處理事情係唔會講，一講就係是非。咁多年冇交手，順其自然，高興場合見到咪見，如果真係有仇都唔會記一世，開心先會記一世。」
採訪：王連連
攝影：陳慧安