徐濠縈、周汶錡、周麗淇及蔡卓妍等昨日齊齊參加法國時裝品牌LV與聯合國兒童基金會（UNICEF）的慈善企劃，各自影相在ig貼圖表達「make a promise」的主題。眾人大抵都以家庭親情為構圖，阿徐就與11歲的囡囡陳康堤母女檔上陣，相中二人以黑白造型，齊齊勾手指表達承諾，當中有一張康堤更抱着愛犬Brownie，十分溫馨。相中見康堤越大越靚女，身高就快與媽咪睇齊，連擺甫士亦有阿徐神髓，果然有潮人DNA遺傳。
此外，今次LV會將每賣一條Lockit鎖仔吊墜或手鏈，就會捐200美元去UNICEF，幫助全球弱勢兒童。
撰文：唐如