旅遊界最近七國咁亂，有份發起倒黃行動、力促旅遊業議會主席黃進達下台嘅香港旅遊從業員聯會榮譽主席林少麟，以及香港旅遊促進會總幹事崔定邦，原來都係自由黨黨員嚟㗎。
難怪旅遊界最近傳言四起，質疑自由黨係咪又搞事？尤其黃進達，係自由黨死對頭經民聯嘅友好嚟㗎噃！
八方聽聞喎，呢件事確實同自由黨無關㗎，為免越描越黑，難怪自由黨特別發出嚴正聲明，以正視聽。
聲明中澄清，兩位黨員林少麟同崔定邦，日前籌辦同出席反對旅遊業議會加強規管嘅遊行活動，純屬係佢哋嘅個人行為，佢哋所持嘅立場並不代表自由黨，自由黨特別申明，該黨係支持旅遊業議會加強監管等措施㗎。