廢青最愛揈錢飛多幾轉日本！日本氣象株式會社昨公佈今年首輪櫻花花期預測，最早開花嘅係東京同名古屋，食正3月底復活節假，梗係要請幾日假去日本探吓小櫻花啦！
第一輪公佈嘅花期包括6個地方，東京、名古屋、甲府地區3月22日會有櫻花開，約一星期左右，即3月29日櫻花就會開到全滿，到時可欣賞到超級壯觀櫻花陣！
會社話喎，由於東、西日本去年11、12月冬天偏暖，估計本月都會比去年暖啲，所以東日本地區嘅櫻花會比去年早開，西日本嘅花期就同以往差不多。北日本正值暖冬，都會早過去年開花。而九州南部花期估計比去年遲少少，特別係鹿兒島地區今年或創出最遲開花紀錄。下次將於本月28日更新花期。