李斯特城前排沉一沉，我求大俠仲以為佢哋嘅神奇之旅係時候完結，點知佢哋禮拜三作客以1:0打沉熱刺，追到同榜首阿仙奴一樣有43分，係得失球爭啲，排住第二位，領先第三位、同日被愛華頓悶和0:0嘅曼城三分。呢場熱刺壓住李斯特城嚟攻，射門仲多到有21次，控球率又超過六成，其中卡尼喺下半場走到個靚位，單刀埋門，好乖巧咁笠過門將，但可惜射中楣！
李城呢場充份發揮佢哋「後勁王」嘅能力，踢到83分鐘，基斯甸富治斯開角球，中堅賀夫企定定頂入，幫李城作客贏1:0。雖然李城𠵱家排緊第二，但領隊雲尼亞里賽後都叫班球員唔好被勝利衝昏頭腦；雲尼亞里承認李城大半場都處於劣勢，但佢話李城最叻就係踢防反。至於熱刺領隊普捷天奴就話輸得好唔抵，但希望球隊可以從失敗中學習。