最近環球股市跌到停唔到，班散戶當然叫苦連天，估唔到對沖基金大鱷艾克曼（Bill Ackman）都要同散戶一齊坐艇。2016年只係過咗短短十幾日，艾克曼旗下基金公司Pershing Square已經蝕咗11%有多，所以話，有時散戶嘅投資智慧唔一定比大鱷差。
艾克曼之所以開年不順，主要因為佢嘅主要投資股份唔生性，就好似艾克曼嘅「心頭好」加拿大製藥商Valeant，年頭到𠵱家足足蝕成16%，另一隻重倉股氣體科技公司Air Products亦都蒸發咗近9%。
愛股大跌，艾克曼都咪話唔頭痕，特別係佢間Pershing Square上年已經蝕咗20.5%，創咗公司成立以來嘅最差記錄。今年唔好話收復失地，反而仲繼續蝕㖭。