「黑貓」新特蘭（圖）喺周三嘅英超護級大戰，作客贏咗史雲斯4:2，喺積分榜咬實「天鵝軍」，唔畀對手逃出降班漩渦。新特蘭最近喺護級壓力下反底，上輪先贏包尾嘅阿士東維拉，呢場對尾四嘅史雲斯，佢哋展現非勝不可嘅決心，靠迪科爾大演帽子戲法，加埋雲安荷特入波，擊敗上半場有基爾洛頓被逐嘅史雲斯。新特蘭贏波後排尾三，追貼到只差史雲斯一分。史雲斯呢場輸波，放唔甩新特蘭同紐卡素，萬一下輪有乜閃失，分分鐘跌落尾二。