多謝CY，因佢一份施政報告，令人人都問乜嘢係「一帶一路」，華華facebook噚日亦都被一帶一路洗版。
金融圈一向都好鍾意拎阿爺嘅經濟口號，去炒作相關股票板塊，阿爺早兩年已經提出一帶一路，市場曾經炒過基建股，但真正贏錢嘅人唔多，令炒友已經無乜興趣，好似智美體育（1661）咁，公司本周一出通告話將會營運「一帶一路馬拉松系列賽」，都冇乜股民理佢，公司股價冇反應。
一個連股民都唔吼嘅概念，有人竟然當佢係寶，可能真係眾人皆醉佢獨醒，大家走寶了吧。
不過，唔知大家仲記唔記得，市場好耐之前都炒作過開發大西北、大三通、小三通等經濟口號，通常阿爺講完，炒友就走去搵相關概念股亂炒一通，唔少財主佬當時都話會趁機會去發掘商機㖭，之但係，𠵱家仲有幾多人記得呢堆商機呢？