若然要連任，各界別都要派下糖。CY噚日宣佈委派民政事務局副秘書長楊德強（圖）擔任「體育專員」，負責統籌同協調跨局或跨部門體育工作，獲委嘅現任民政事務局副秘書長、55歲楊德強喺體育方面確係有啲威水史。
港大文學院學士、中大工商管理碩士畢業嘅楊德強，曾經係1980至1982年南華體育會手球隊隊長，攞過手球聯賽冠軍；除咗擔任過港大足球隊隊長，仲係1984年港大全年最佳運動員。據聞佢仲係香港壁球總會壁球聯賽委員會委員，乜球都識啲！
據知呢個新職位嘅職級係D3，同副秘一樣。而1994年加入政務職系嘅楊德強，先後出任過馬術項目統籌總監（民政事務局）、元朗民政事務專員、財經事務及庫務局副秘書長。