向來唔多讚傳媒嘅特首梁振英，噚日喺記者會上竟然點名多謝《東方日報》，難怪唔少傳媒同八方一樣，個心突然倒抽一口涼氣。
《東方日報》近一個月以顯著篇幅，報道難民滯留本港等待核實酷刑聲請，質疑當中唔少都係假難民；而《東方日報》記者喺會上獲主持記招嘅新聞統籌專員馮煒光「點燈」，成為第三位發問嘅記者，問及港府係咪會加快處理「酷刑聲請」、甚至退出聯合國《禁止酷刑公約》？
CY呢次好叻呀，好似先知咁，知道有人會問噃，答案準備得好充足㖭呀，怪唔得回應時振振有詞，話知道唔少人都利用同濫用禁止酷刑公約，抵港後卻涉及不法活動，最後仲話喎：「我知道傳媒都關心呢件事，亦都多謝《東方日報》喺這個問題上做咗好多報道。」