繼港股舊年8至9月形成9日RSI底背馳後，近期再出現嚴重超賣，中線弱勢係近30年少見，即使比較30年內最長命的熊市，即係2000年4月至2003年5月，今次跟足呢個最差劇本運行，隻熊都已經行咗一半，併圖之下，估計等多一個月左右，港股至少能出現小陽春。如果投資者稍後見到恒指再破底，然後回穩，就值得入市了。
國際家居零售（1373）系列最後一回，先同市值相若、持有阿信屋嘅CEC國際（759）比一比。第一，阿信屋並非賣必需品，市場競爭較劇烈；第二，日本城賣一把𠝹刀，擺一兩年都係一把𠝹刀，但阿信屋一支午後の紅茶，擺咗一兩年你又夠唔夠膽飲？兩者存貨管理嘅優勢，以日本城佔先得多；第三，阿信屋由日本直送，面對供應商議價能力較低，你睇阿信屋曾經入貨要一櫃櫃咁買，然後又散唔到貨就知，相對日本城並非由日本入貨，產品標準化程度較高，採購管理嘅優勢，都係日本城更勝一籌。
至於永旺（984）又如何，舊年6月底，香港店舖數目46間，雖然店舖面積遠較一般日本城為大，但地區滲透率明顯不如日本城，改造空間及意欲亦不如日本城大。永旺持有28.15億元淨現金，較市值19.37億元還高，即使業務前景不算亮麗，估值超賤，估計永旺即使見底，股價亦難有爆發力。
晉佳
https://www.facebook.com/advanceguy1/