特首梁振英噚日公佈施政報告，花生友發現冇乜政黨，包括建制派，可以大大聲講成功爭取到乜嘢，有泛民立法會議員笑住同花生友講，今次CY掛住擦習近平鞋，大講一帶一路，理得你建制派死，佢仲話其實冇着數都算，有建制派要輸凸先陰功！佢講邊個？咪工聯會囉！
呢個泛民立法會議員一路笑一路話，工聯會一向撐CY，榮譽會長鄭耀棠係行會成員，佔中前後日日撐CY，邊個叫CY下台，佢一定出嚟護主；理事長吳秋北仲企埋出嚟反佔中，咁為CY，喺施政報告換到乜呢？標準工時立法冇，撤銷強積金對沖又冇，全民退保又冇，連之前工聯會日唱夜唱，以為係「最低消費」嘅勞工假同公眾假合併，CY提都冇提，仲要喺施政報告話研究輸入外勞喎，又難怪工聯會開記者會時嬲嬲豬！
呢個泛民議員仲話，CY研究輸入外勞，其實係針對建造業，擺明討好商界，賣工聯會豬仔，事關工聯會唔少支持者嚟自建造業，如果真係輸入外勞，建造業人工下調，班工人仲唔入晒工聯會數？9月工聯會要選立法會地區直選嘅人，仲唔俾工黨追住打？
工黨李卓人同花生友講，CY今次明剃工聯會眼眉，擺明撐地產商出賣勞工界，真係撐CY冇回報！有工黨口痕友仲話，睇見工聯會喺記者會講到咁兇狠，施政報告敢唔敢投反對票、鄭耀棠敢唔敢退出行會抗議？「如果工聯會講就兇狠，做就冇人，真係即刻郁佢出賣工人啦！」
花生友
周二、四刊出