渣打銀行支持咗「渣打馬拉松」廿年，今年首度搞花臣，為跑手提供存款利率優惠。參賽選手只要喺特定時間完成賽事，喺渣打就有3個月2厘港元儲蓄存款優惠，如果唔達標，就只得1厘，即係鼓勵大家跑快啲。
𠵱家渣打3個月定期存款年利率得0.2厘，所以2厘其實幾着數。咁個「特定時間」係咪好harsh呢？以平時最多人跑嘅10公里為例，要喺1小時10分鐘之內完成，半馬要求2小時20分，全馬就要4小時45分。
體育達人雷雄德博士認為，以上標準對於60歲以上嘅參賽者嚟講，有啲「忟水」，後生就可以。佢又話，馬拉松嘅原意係想跑手同自己比賽，如果太着重獎品，心急跑快咗唔係咁好，尤其係對老人家，佢對渣打呢個做法有啲保留咁話。