特首梁振英昨日發表任內最後一份涵蓋全年的施政報告，在庫房水浸下大灑近2,200億元，推出十幾項一次性撥款措施。呢份報告大打民生牌，巨細無遺到連公廁加設防滑地面、自動感應水龍頭都有提及，咁細微細眼，差點以為係區議會報告。我就比較留意經濟議題，搵下投資機會。
踏入2016年，中港股市唔慌唔開門紅……到見血，要怪就怪人行主導人民幣貶值累事，熔斷機制令恐慌情緒放大。熔斷機制面世4日已自行了斷，人民幣前日絕地反擊，人行干預離岸市場，掃高滙價、挾高拆息，兩招KO國際炒家。
人民幣回穩，港股昨日即告反彈，但A股尾市急轉直下，滬綜指跌破3000關，令港股升幅斬半，收市只升223點或1.13%，報19934，兩萬關得而復失。港股今年以來8個交易日，錄得8連陰，首6日更出現3個下跌裂口，短線急跌後反彈唔奇，但中線仍偏淡。
中國建築候回吐買入
滙市波譎雲詭，唔單止人民幣波動，兌美元滙價，其他貨幣亦普遍下跌；大宗商品除了黃金等貴價金屬發揮避險作用外，其他繼續賤賣。隔晚油價一度跌破每桶30美元，舊年2月花旗初次預測油價可能跌至20美元，9月高盛都話可能見20美元，市場仍當講笑，今時今日，「2字頭」不遠矣，早兩日渣打更估今年可能見10美元，即係每公升0.49港元，5毫有找！油價平過2008年環球經濟衰退時，係咪意味世界性蕭條呢？
再睇份施政報告，提出加強香港在一帶一路中的角色、推動創新科技、發展大嶼山等。當中，發展大嶼山的規模，比舊年施政報告提出發展東大嶼都會更大。咁多工程，難怪建築股炒上，我就睇中龍頭中國建築（3311）。
中國建築在香港、澳門擁有豐富住宅工程及政府基建經驗，舊年先後中標香港沙中線會展站及西面鐵路隧道工程等，合約保持增長，帶動營業額及盈利增長。一眾本港建築股中，中國建築毛利率最高，以舊年上半年計，達14.8%，相對遠東環球（830）、新福港（1447）、俊和發展（711）及新昌營造（404）分別為10.5%、6.1%、5.4%及4.5%，明顯高好多。
中國建築昨收報12.32元，升3.9%。綜合券商預測，2015年每股盈利料增19%，2016年再增22%，相當於PE 9.2倍，估值吸引。可候回吐買入，目標價15.3元，止蝕價11元。
割柑人
本欄逢周四刊出