千呼萬喚，施丹終於成為新一任皇家馬德里教練，喺上任記者會上，施丹帶埋老婆及四個仔，同主席佩雷斯一齊合照，而且據皇馬喉舌之一《阿斯報》講，施丹獲佩雷斯百分百支持，可以全權管理買賣球員工作，甚至比摩連奴時期更有權。要睇佩雷斯信唔信一位教練，睇佢放唔放水買人就知，賓迪尼斯上任後買得高華錫一個，就知佢好快炒硬。
施丹上任冇耐就傳今夏收購目標，最厲害係想用一億鎊收購法國防中保羅普巴；佩雷斯之前就有所謂「費高+馬基列尼政策」，攻擊球員可以有幾貴就買幾貴，相反後防呀、做防中呢啲粗重角色，買一啲平貨就ok，本人無意對馬基列尼不敬，甚至覺得佢係皇馬十幾年嚟最佳防中添，但始終星味唔夠，都係得唔到佩雷斯欣賞，最後賣去車路士。
當然，今時今日要買好防中，同買好前鋒一樣都唔會平，如果施丹一心要買保羅普巴，最大離隊可能都係卻奧斯（白衫）；其實卻奧斯加盟至今一直唔差，26歲仔已經贏過世界盃、歐聯等大獎，處理死球都有一手，可惜派系問題，皇馬德國幫得番佢一個人，勢孤力弱，牙力邊夠森巴幫、法國幫、本土幫等。而且佩雷斯始終係生意人，呢幾年都係行貴買貴賣政策，高價入加里夫巴利、占士洛迪古斯，都高價放番奧斯爾、迪馬利亞出去，平衡番收支，以卻奧斯今時今日國家隊地位，大把德甲球隊，甚至英超球隊想要，皇馬收番三、四千萬鎊係基本數。
文：牽牛