今個年頭，打工咁辛苦，到底為啲乜？既然我們都有一個看不清的未來、生活在無限變數之中，不如開開心心、輕輕鬆鬆咁過每一天啦。
話說廿幾年前，幾間4As廣告公司咁啱位於同一幢商業大廈，每逢午飯時間，員工都差不多在同一鐘數搭𨋢落街食飯。喺最低樓層嘅員工成日都要等好幾round先入到𨋢。點解，原來在較高樓層那些同行友好，入咗𨋢後，都不約而同一字排開、企晒喺門口，扮晒歡樂滿東華咁，𨋢已爆，下一部啦唔該！真係大整蠱。
又有一次，有位creative同事有少許强迫症。佢喺自己個位養咗一缸小熱帶魚，清一色紅色同款一共十條，多一條少一條都會要了他的命。啲鬼馬同事，等佢放咗假，換咗條完全唔同款唔同色嘅魚入去，佢一返工，除咗聽到慘叫一聲，就係成班坐定定等睇好戲嘅好同事嘅爆笑連連。
正所謂食過翻尋味，鬼馬同事又趁佢去外國出差，將一張魚樂無窮硬照貼喺佢嘅魚缸外面，換走晒裏面嘅所有魚同水，呢位creative同事返嚟一見到，差唔多嚇到昏死過去。
仲未完，佢成個筆筒一向都排放了十支一樣長短、同一款式及99%鋒利嘅黃色鉛筆。有次開完會返來又發覺全部鉛筆俾人換走了，取而代之嘅係十支紅色原子筆，你話想唔想死？
另外有位同事好受大家歡迎，花名叫阿雞，同事為咗賀佢牛一，專誠劏咗隻生雞，血灑當場，高掛公司Reception logo之下，好叫每位返工經過嘅員工都不容錯過。
又有一次，有位Account Service型仔同事生日，當日一返工，即時俾十個大漢包圍，除晒佢嘅衫褲（好彩，仲除剩條底褲），用透明膠紙五花大綁硬黐喺張有轆嘅工作凳，二話不說，推咗入𨋢，直送地下大堂，再伸佢一腳。
以上種種，都發生喺廿年前或以上，假若今天出現，可能會俾人report去平機會、投訴被欺凌及放上網成為本周高登Top 10。Anyway，廣告公司應該有的是無限創意，而創意尤其係需要多點自由、多點瘋狂。
文廸晞
mailto:heyadmen@gmail.com