CY今年施政報告狂loop「一帶一路」，零舍長氣，讀到中午12點鐘，要嚟個10分鐘休息位。唔少議員一聽到有得小休，即刻衝入立法會前廳。行咁急做乜？原來係為醫肚，當中以建制派議員同官員佔多數，唔通係因為民主派議員聽到施政報告後都唔多開胃？
唔少議員都把握時間，極速鯨吞點心，包括民建聯主席李慧琼，喺議事廳成日瞓但食嘢時卻好精神嘅「象哥」黃定光，以及Tree根鍾樹根等；議事廳內冇乜人理嘅吳克儉，喺前廳繼續「獨食」。
工聯會黃國健更一度叉起點心，示意中策組「左王」邵善波齊齊食，但左王波擰擰頭轉身走，似乎覺得啲嘢食唔太啱胃口。梁班子另一波、發展局局長陳茂波（圖）尾段亦加入食嘢團，事後讚啲點心好食，仲好有手尾抹埋嘴。