今年44歲嘅康華獲高登仔封為「最正奸妃」，佢最近接受咗一本周刊訪問，講到為慳錢照顧年過80嘅父母，以前會喺片場攞多個飯盒留下一餐食，又自嘲自己以前冇腦，渾渾噩噩又唔識珍惜。佢又講番一個人去內地拍劇慘爆經歷，包括要瞓軍營同埋喺零下40幾度嘅地方拍攝，搞到生凍瘡。
小鮮肉嗒晒糖
噚日馮仁昭打電話畀康華問候佢，同無綫冇合約嘅佢喺內地開緊工，但就話同無綫都傾緊合作，佢話：「都傾緊嘅，一直合作都係用好自由嘅方式，有嘢就返嚟做，咁我又可以喺大陸做其他嘢。」
問康華喺香港接job搵錢係咪少好多？佢就話每個地方一定唔同，但係屋企人緊要啲，康華話想多啲時間照顧父母：「時間miss咗就冇㗎喇，所以真係想留多啲時間喺香港，老人家自己照顧自己始終照顧得唔好，過去5年我都返內地跑山，真係過時過節先返到嚟。」
講到感情生活，康華接受周刊訪問時就話𠵱家冇拍拖，但認有人追，不過全部年紀都細過佢，後來先知個個得20幾歲，惟有同啲男仔講姐姐唔啱你㗎咁囉！
撰文：馮仁昭