正所謂文章有價，不過如果做到香港首富李嘉誠「文膽」，身價又可以去到邊？長江實業地產有限公司近日喺各大求職網站刊登招聘廣告（圖），以逾百萬年薪招聘「中文主任」， 講明要負責撰寫管理層日常信函、演辭同做文書工作，求職者要有20年或以上中文文書工作經驗，仲要精通中國語文、包括古文、歷史同文化，要有具創意及優秀書寫技巧。有商界中人曾經同八方講，超人嘅古文好過唔少人，要過精通古文一關怕且唔易，好似超人前中文秘書楊興安，佢就做過《明報》創辦人、大作家查良鏞嘅中文秘書，換句話講，中文程度要金庸睇得上眼，超人先會用，咁大概估到長實對中文主任嘅要求有幾高。