呢排碟場都幾悶，冇乜特技動作片畀龍叔叔炸吓機，老友昌哥隊隻《同班同學》出嚟話唔錯，吓？十幾歲𡃁妹嘅返學古仔，冇乜feel喎！點知昌哥陰陰嘴笑，話套戲講學生妹援交，入面有唔少「動作」場面，仲話三個女主角都全裸演出喎。係？雖然龍叔叔對色情片極之極之反感，不過都好有興趣探討吓𡃁妹自甘墮落嘅心態，畀隻blu-ray我吖唔該！套戲講明真人真事改編，三個女主角各有理由做援交，最大膽唔係佢哋露成點或露幾多點，而係做援交可以casual到呢個地步，為交租食飯、為友情下海等等，講到香港周街都有學生妹援交。荒謬嗎？赤裸裸嘅唔止係胴體，仲有殘酷嘅現實，起碼係真人真事，唔似吳亮星啲「商界朋友」咁天馬行空，偷渡返大陸嫖妓都噏得出，係咪翻睇咗好多次《飛虎出征》呀？
講番套戲，導演同編劇係陸以心，唔算有名氣，不過掛咗監製彭浩翔個朵，再打住三級片旗號，點都令人期待套戲有啲嘢出現。有幾個元素係彭浩翔近年慣用伎倆，就算今次只係監製身份，亦一樣出現粗口同鹹濕呢啲要素，宅男同麻甩佬本應幾受落。龍叔叔仲記得N年前套《學校風雲》，張耀揚鬧袁潔瑩：「除咗校服咪又係雞？」少女援交題材，從來不乏校服誘惑喎！再睇睇演員名單，連「大陸國寶」蒼井空、DaDa同暴龍哥女神邵音音都有份，簡直係鑽石級AV陣容啦。龍叔叔諗多咗喇，三大女神只係串場角色，曇花一現，反而三位18歲女主角，就真係瞓晒身演出。老實講，三位小妹妹樣貌唔算出眾、身材亦唔係玲瓏，不過單係連毛髮都纖毫畢現嘅全裸演出，同埋唔算少嘅動作場面，演起嚟都自然唔突兀，已證明呢一代嘅後生女係幾咁夠膽識。
劇情鬆散欠批判性
電影係有message嘅，只可惜劇情有啲鬆散，集合咗援交、爭仔、同性戀等話題，但又全冇批判性，只係好單純嘅爭風呷醋過程，加上導演採用好少女嗰種拍法，男人睇會覺得幾悶吓，唔係偶爾有啲動作場面充撐吓，應該好快瞌着咗。龍叔叔最鍾意四眼宅男嫖妓破處一幕，戰戰兢兢又不停被屈加錢，應該係好多處男無時無刻性幻想嘅場口。女士呢？一樣有男神王宗堯全裸露股愛愛場面，照顧周到。不過龍叔叔相信，女仔睇呢套戲應該有更大共鳴，尤其係對女仔間嘅友情考驗，原來為咗「博friend」，可以儍到做援交，三個女仔可以為爭一條仔而互出陰招，最後翻臉收場，但又竟然可以為咗救一隻狗仔而走番埋一齊，仲要有曖昧嘅同性關係，人狗戀同樣嚟得casual。
藍光碟表現不過不失，不過有幾幕用柔鏡拍嘅少女嬉戲場面，都幾有美感。高清下真係纖毫畢現，幾乎連男神王宗堯個啷啷都隱約見到埋。音效冇乜好講，反而bonus少少哋仲好睇，幾條刪除片段補充咗角色間嘅感情描繪，例如叫雞宅男，真係好似媾女咁花盡心思，純純的愛又幾討人歡心。
編輯：謝慧珊
美術：楊永昌
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。