繼前年跟張達明（達Ming）舉行棟篤笑後，農夫得知今年再有機會跟達明開棟篤唱，一心盼望今次會是事業另一開端長搵長有，怎料瓣數多多的達Ming指今次棟篤唱只是事業上閃亮幾晚，之後便熄燈各自埋首工作，正當農夫指一心諗住走巡迴時，達明笑說：「走去邊，九龍城呀？」
撰文：馬建華
棟篤笑文化多年來也是給社會抒發怨氣的一個窗口，有多年棟篤笑演出經驗的張達明，繼前年與農夫首度合作舉行棟篤笑後，今年3月會再次合體，並將笑彈再昇華變成棟篤唱，假伊館舉行一連三場「達Ming農夫"已經爆咗"棟篤唱」。達Ming跟農夫日前於中環受訪，他們指今次是全新演出內容，由於上次演出是達Ming負責講，農夫負責唱，甚少交流部份，但今次會加強互動性，達Ming說：「今次好玩好多，最大分別係棟篤笑由農夫負責，我就負責唱。」C君笑問會否影響銷情，達Ming好有信心指這才是賣點吸引觀眾入場。
陸永請囡囡上台
距離開騷還有一段日子，農夫經已被達Ming督促下，度好一半內容，歌曲部份亦已完成，達Ming說：「今次準備時間好充足，個騷原定喺2015年年尾舉行，場地個期爆滿，順延至2016年3月，比平時多咗四個月時間。」達Ming自言是緊張大師，以往跟黃子華同吳鎮宇開棟篤騷時，也不停逼大家早交稿，但他們總是遲遲未落實內容，達Ming說：「我諗我性格要改過，唔好咁急。」身旁農夫即高呼不需要改。
農夫坦言今次度橋更為安心，因達Ming經驗豐富令他們能將話題講到最盡，達Ming笑指經過開會後都自覺內容太盡而有些修改，陸永表示內容沒有爆太多娛樂圈秘密，反而主力着墨在達Ming的強項，大講社會時事話題，他們透露話題全是直截了當去講，沒有任何隱喻，務求令觀眾聽得暢快，達Ming笑說：「我有啲擔心陸永，佢已經係爸爸，爸爸有啲嘢唔可以隨便講，佢小朋友太細，好擔心佢啲小朋友他日搵學校時，你爸爸講過嗰啲有影響。」C君笑說：「不如讀私校啦，官校唔啱你。」
不過陸永指毫無壓力，還可以邀請女兒上台讀信，他補充因騷內容沒涉及教育，但達Ming指只是未開會傾到，怎會走得甩TSA這個熱門話題，C君安慰陸永說：「可能咁啱講出老師心聲，變成不如你入嚟讀。」
靚衫俾達Ming着晒
看過舞台設計後，農夫形容比他們演唱會舞台更華麗，C君說：「冇諗過達Ming構思嘅都實現到，有咁多資金放喺舞台，點解唔畀多啲演員酬勞。」農夫指所有靚衫都穿在達Ming身上，但達Ming反指所有女舞蹈員都在農夫身旁，陸永說：「你講緊嘢，唔通畀個dancer摸你，我哋都冇衫着，畀dancer我哋都可以。」
農夫指今次開騷全靠達Ming帶挈，至於將來會否再有合作？達Ming說：「我有幾個電影劇本喺手，盡量擺佢哋入去，我都做唔到主角。」農夫表示能夠跟達Ming搵食，連茶水也不介意做，達Ming補充指棟篤唱只是大家事業上閃亮幾晚，賺不到大錢，只希望將歡笑帶畀觀眾，熄燈後就各自返回工作崗位，農夫聞言即指還期待走巡迴，達Ming聽了笑說：「走去邊？九龍城。」農夫覺得也是好開端，做完灣仔便過海做九龍城。