中國女足靚女門將王飛，喺2015年一直喺歐洲搵食，先後效力過德國嘅波茨坦同埋法國嘅里昂；不過佢喺九月加盟里昂之後上陣機會唔多，終於喺噚日透過自己微博宣佈已經同里昂解約。王飛喺微博度話其實好唔捨得法國，話如果唔係為咗今年里約奧運，一定會選擇留低。王飛喺2014年底免費離隊，當時同大連球會有約定，回國就會繼續效力；如無意外佢將會返去加盟大連權健。