原本只騎至本月31日賽事之小鮮肉騎師史卓豐，剛周三已獲續牌跑至季尾煞科，由於當晚他因胃部不適，逼退下火線，原定八匹谷戰坐騎悉數易配，其中「龍之欣」更由霍勵賢接手爆63倍冷門贏馬，令史卓豐錯過贏馬慶祝續牌的機會。
史卓豐周四休息一天後，這天（8日）恢復到場操馬及試閘，個子甚高的他解釋，原來剛周二、周三為了減磅，所以狂節食唔飲水，結果搞到脫水胃痛，無奈缺陣，但相信對長遠健康應無大影響。
史卓豐又透露，這幾天在家仍要繼節食，原因是本周六（9日）須策115磅的沈廐馬「阿甘」，但他謂會小心翼翼，保重身體，現在亦已不再胃痛。史卓豐進一步解釋，自己大致可造115磅，雖然超兩磅至117磅亦策騎可上陣，但他不想座騎超磅，影響爭勝機會，所以要努力keep住體重。
史卓豐咁緊張「阿甘」當然有原因，此駒上仗乃久休7個月復出，亦跑獲季軍，可見有分在手，亞軍「人民武士」再出更贏新馬錦標，反映賽事水準高。今次「阿甘」再跑三戰得兩冠一季的1400米，梗係牌面馬。史卓豐笑言已唔見了「龍之欣」一場頭馬，一定努力為「阿甘」搏殺，務求彌補自己嘅損失喎！