練馬師呂健威安排同主馬同日一齊跑常有佳作，早前一對吉祥團體名下之「幸運如意」及「吉祥」同日分途出擊，結果前駒贏馬而回。今期賽事（9日）練者又安排另一對同主馬「軍歌」及「軍火」同日上陣，而且雙雙打王牌報名，睇部署志不在小。
其實「軍」系馬同日一齊出擊已有先例可援，呂健威上季便曾部署「軍火」及「軍號」同日分途上陣，前駒贏馬後駒入Q，可算交足功課，今戰替年輕女馬主郭芹君一對名下馬「軍歌」及「軍火」齊用王牌報名，當然不能輕視。
第八場三班1650米泥地之「軍火」，上季尾初跑泥地一哩即打開在港勝門，上仗季內初出再跑同程，未熱身下仍能後追第五，僅負於頭馬「齊歡笑」不足兩身位，復課安排試大閘，狀態更進一步，續爭贏馬路程，可望取得今季首W。
至於第七場二班1200米草地之「軍歌」，今季兩勝谷草1200米，贏馬姿態有餘未盡，上仗轉跑田草只得第七，只因全程走外叠望空競跑，純輸陣上形勢而已，今次只要取得遮擋，以其後勁可一撼對手。