最近高登興玩「你問我答」，八方估唔到連高登CEO林祖舜都玩埋一份，開個po「做咗高登CEO八年，你問我答」，幾尖銳嘅問題都照答，仲借機立此存照，講明唔會用自己方式返大陸！
有高登仔問佢點睇網民叫佢做草泥馬，方丈話個樣似，所以冇計，仲話非常喜歡呢個名！問佢出賣過幾多巴打絲打畀中共、政府、警察，方丈叫對方放心，佢冇出賣高登仔。有高登仔問佢點睇網絡23條，方丈答得直接：「反對啦！」有人更玩嘢，明知高登成日有反共po，於是問方丈覺得有冇機會步李波後塵，被人用自己方式返大陸？方丈即時「脷伸」：「我唔會用自己方式返大陸！」如果有日方丈「被返大陸」，大家明啦！