非洲足協喺周四宣佈，26歲嘅多蒙特射手奧巴美揚，力壓32歲嘅曼城中場耶耶托尼，成為2015年非洲足球先生嘅得獎者；今次奧巴美揚除咗係首次贏得呢項殊榮之外，更成功打破咗耶耶托尼連續四年壟斷冠軍嘅局面！奧巴美揚今季狀態勁弗，喺17場德甲聯賽已經入咗18球，高踞射手榜榜首。佢喺非洲足協嘅教練同技術總監嘅投票之中，拎到143分，險勝得136分嘅耶耶托尼，而史雲斯嘅加納籍中場阿休就以112分排第三。