斯賓克（Spink）本月15至17日舉行香港拍賣會，呈獻嘅珍品包括郵政瑰寶、珍罕錢幣同紙幣，焦點拍品係錯色印刷嘅香港維多利亞女皇像96先時橄欖棕色四方連票（圖），據報全球存世得呢一件，怪唔得估價高達700萬至1,000萬港幣。
原來1862年香港發行開埠以來嘅首批郵票，都係棕灰色，印刷公司德拉羅（De la Rue）喺1864年3月印製一批96先時郵票、共52全張，卻因印刷錯誤令票面變成橄欖棕色。
香港郵政局發現有錯時未能及時改印，所以喺1865年2月推出市面，直至同年7月下旬票色正確嘅新票印妥並付運抵港後，橄欖棕色錯印色票先停用。而呢款錯色郵票全球僅48件未使用過的新票存世，今次拍賣嘅係當中唯一嘅四方連票。