由民主黨前成員黃成智同狄志遠牽頭搞嘅新思維，噚晚舉行成立暨籌款晚宴（圖），其間唔准傳媒自由採訪，全部要留喺「豬欄」，公關話因為有「大人物」到場，「大人物」原來係過去杯葛過唔聽話政黨酒會嘅特首梁振英同一眾司局長。
除咗CY，政務司司長林鄭月娥、財政司司長曾俊華、陳家強、譚志源、陳茂波等局長都有到場；建制派議員亦好多，包括馬逢國、鍾國斌同陳克勤。雖則喺好近中聯辦嘅西港城搞成立典禮，但唔見中聯辦官員到場；CY到場後冇發言，台下講完「恭喜恭喜」及上台祝酒後就由後門離場。
民主派到場者則包括民協主席廖成利、民主黨副主席羅健熙等，冇立法會議員到場。關心妍演唱《愛是不保留》娛賓。主席狄志遠台上發言時指，早前與劉兆佳傾談後，明白正常人覺得「第三道路」無得行，「我哋呢啲儍人覺得行呢條路有得行，係一班發緊夢嘅人」，但強調會繼續「癡人說夢話」。晚會拍賣環節籌到140萬，加埋賣枱嘅百萬，已達籌款目標。