唔少人都話今年經濟差，睇淡旅遊業。但香港航空（圖）就逆市擴展。香港航空首席營運官王證皓認為，時代唔同，經濟點差，年輕一代一樣想去旅行，港航今年會增加十個航點，其中香港直航澳洲黃金海岸與開恩茲今日首航，係香港唯一直航黃金海岸嘅航班。稍後又會開辦柬埔寨金邊，同埋日本鳥取縣米子市嘅航班。鳥取係鬼太郎及偵探柯南漫畫嘅發源地，啱哂漫畫迷朝聖。
港航機隊今年會由27架增至36架，並計劃招聘1,000人，包括空服員、機師、維修人員等。王證皓話，自從《衝上雲霄》熱播，多咗年輕人想入行，係年輕人自薦想做飛機師。佢又話，港航以香港為基地，希望盡量請本地人，目前空服員九成九係本地人。