立法會主席、民建聯曾鈺成同特首梁振英有幾唔啱key？嘩，唔使八方畫出腸啩！雖則曾鈺成對於選特首，已經由當初有心有力變成冇心亦唔會發力，但唔等於唔可以發功推人出戰噃！
佢接受傳媒訪問時提到，就算財政司司長曾俊華明年同CY一齊選特首，都冇問題囉，似乎都唔想爭取連任嘅梁振英喺呢場仗太輕鬆。
政改原地踏步，特首選舉依舊由千二人小圈子選出，但曾鈺成認為仲可以喺圈裏鬥。佢接受《經濟日報》訪問時提到，希望明年特首選舉有多於一個中央接受、兼有唔同理念嘅人參選，佢話香港有唔少合適人選，但無可避免中央樂意任命嘅候選人呢……一定係現時喺建制中有要職喎。
笑言「支持好多人」
咁如果CY同鬍鬚曾一齊run，有冇問題呢？曾鈺成話呀，如果喺建制甚至政府內擔任要職嘅人突然出嚟「跑馬仔」，一定會對政府管治有影響，但當年CY同唐唐都係咁啫，即係冇問題啦，似乎都係發緊功，想民望不俗深獲市民喜愛嘅財爺出嚟跑下咁噃。佢同時批評上次特首選舉「被醜聞佔去主要位置」，期望下屆係比政綱、比理念，避免負面攻擊噃。
雙「曾」合璧咁厲害？曾鈺成噚日出席公開場合，八方梗係問佢點解支持財爺參選，佢對此冇直接否認喎，只係笑笑口話自己「支持好多人」、「支持特區政府」。
李八方
mailto:pf_lee@appledaily.com