第10屆本地漁農美食迎春嘉年華噚日起至本周日，喺旺角花墟公園舉行，有逾350個攤位展銷本地漁農產品同各式乾貨，預計有逾10萬人入場。
今年大會以本地色彩繽紛農作物為主題，包括彩色椰菜花同蕃茄，會場又設模擬田園，示範栽種；模擬魚場則介紹本地養殖魚類。喺元朗大生圍開設有機魚塘嘅根叔話呀，今年天氣暖，魚穫甚豐，烏頭、草鯇、大頭魚都好肥美；設於錦田嘅歐羅有機農場農夫卿姐就話喎，天氣和暖令椰菜、西蘭花同士多啤梨等冬天生長嘅作物「生長唔到」，但唔敢賣得貴。
乾貨區都人頭湧湧，周太一入場就花咗逾千蚊買花膠、金蠔同一口和牛等。八方仲發現另類焦點，有位外藉女子賣菜喎。嚟自俄羅斯嘅Sophia話今次係做義工，佢咁啱來港旅遊，順手喺菜檔賣蔬菜，想藉此推動下社會生態喎。